हरिः ओम्

Sloka Text in Telugu , Kannada, Gujarati, Devanagari, English

ಸುಂದರಕಾಂಡ.
ಅಥ ಪಂಚಚತ್ತ್ವಾರಿಂಶಸ್ಸರ್ಗಃ||

ತತಸ್ತೇ ರಾಕ್ಷಸೇಂದ್ರೇಣ ಚೋದಿತಾ ಮಂತ್ರಿಣಸ್ಸುತಾಃ|
ನಿರ್ಯಯುರ್ಭವನಾತ್ ತಸ್ಮಾತ್ ಸಪ್ತಸಪ್ತಾರ್ಚಿವರ್ಚಸಃ||1||

ಮಹಬಲಪರೀವಾರಾ ಧನುಷ್ಮಂತೋ ಮಹಾಬಲಾಃ|
ಕೃತಾಸ್ತ್ರಾಸ್ತ್ರವಿದಾಂ ಶ್ರೇಷ್ಠಾಃ ಪರಸ್ಪರಜಯೈಷಿಣಃ||2||

ಹೇಮಜಾಲಪರಿಕ್ಷಿಪ್ತೈರ್ಧ್ವಜವದ್ಭಿಃ ಪತಾಕಿಭಿಃ|
ತೋಯದಸ್ವನನಿರ್ಘೋಷೈ ರ್ವಾಜೀಯುಕ್ತರ್ಮಹಾರಥೈಃ||3||

ತಪ್ತಕಾಂಚನ ಚಿತ್ರಾಣಿ ಚಾಪಾನ್ಯಮಿತ ವಿಕ್ರಮಾಃ|
ವಿಷ್ಫಾರಯಂತಃ ಸಂಹೃಷ್ಟಾಃ ತಟಿತ್ವಂತ ಇವಾಂಬುದಾಃ||4||

ಜನನ್ಯಸ್ತು ತತಸ್ತೇಷಾಂ ವಿದಿತಾ ಕಿಂಕರಾನ್ ಹತಾನ್|
ಬಭೂವುಶ್ಶೋಕಸಂಭ್ರಾಂತಾಃ ಸಬಾಂಧವಸುಹೃಜ್ಜನಾಃ||5||

ತೇ ಪರಸ್ಪರಸಂಘರ್ಷಾ ತಪ್ತಕಾಂಚನಭೂಷಣಾಃ|
ಅಭಿಪೇತುರ್ಹನೂಮಂತಂ ತೋರಣಸ್ಥ ಮವಸ್ಥಿತಮ್||6||

ಸೃಜಂತೋ ಬಾಣವೃಷ್ಟಿಂ ತೇ ರಥಗರ್ಜಿತ ನಿಸ್ಸ್ವನಾಃ|
ವೃಷ್ಟಿಮಂತ ಇವಾಂಬೋಧಾ ವಿಚೇರುರ್ನೈರೃತಾಂಬುದಾಃ||7||

ಅವಕೀರ್ಣಸ್ತತಸ್ತಾಭಿರ್ಹನುಮಾನ್ ಶರವೃಷ್ಟಿಭಿಃ|
ಅಭವತ್ಸಂವೃತಾಕಾರಃ ಶೈಲಾರಾಡಿವ ವೃಷ್ಟಿಭಿಃ||8||

ಸ ಶರಾನ್ಮೋಘಯಾಮಾಸ ತೇಷಾ ಮಾಶುಚರಃ ಕಪಿಃ|
ರಥವೇಗಂ ಚ ವೀರಾಣಾಂ ವಿಚರನ್ವಿಮಲೇಂಬರೇ||9||

ಸತೈಃ ಕ್ರೀಡನ್ ಧನುಷ್ಮದ್ಭಿರ್ವ್ಯೋಮ್ನಿ ವೀರಃ ಪ್ರಕಾಶತೇ|
ಧನುಷ್ಮದ್ಭಿರ್ಯಥಾ ಮೇಘೈರ್ಮಾರುತಃ ಪ್ರಭುರಂಬರೇ||10||

ಸಕೃತ್ವಾ ನಿನದಂ ಘೋರಂ ತ್ರಾಸಯಂ ಸ್ತಾಂ ಮಹಾಚಮೂಮ್|
ಚಕಾರ ಹನುಮಾನ್ ವೇಗಂ ತೇಷು ರಕ್ಷಸ್ಸು ವೀರ್ಯವಾನ್||11||

ತಲೇನಾಭ್ಯಹನತ್ಕಾಂಶ್ಚಿತ್ ಪಾದೈಃ ಕಾಂಶ್ಚಿತ್ಪರಂತಪಃ
ಮುಷ್ಟಿನಾಭ್ಯಹನತ್ಕಾಂಚಿನ್ ನಖೈಃ ಕಾಂಶ್ಚಿದ್ವ್ಯದಾರಯತ್||12||

ಪ್ರಮಮಾಥೋರಸಾ ಕಾಂಶ್ಚಿದೂರೂಭ್ಯಾಂ ಅಪರಾನ್ ಕಪಿಃ|
ಕೇಚಿತ್ತಸ್ಯ ನಿನಾದೇನ ತತ್ರೈವ ಪತಿತಾ ಭುವಿ||13||

ತತಸ್ತೇಷ್ವವಸನ್ನೇಷು ಭೂಮೌ ನಿಪತಿತೇಷು ಚ|
ತತ್ಸೈನ್ಯಮಗಮತ್ ಸರ್ವಂ ದಿಶೋದಶ ಭಯಾರ್ದಿತಮ್||14||

ವಿನೇದುರ್ವಿಸ್ವರಂ ನಾಗಾ ನಿಪೇತುರ್ಭುವಿ ವಾಜಿನಃ|
ಭಗ್ನನೀಡಧ್ವಜಚ್ಚತ್ರೈರ್ಭೂಶ್ಚ ಕೀರ್ಣಾsಭವ ದ್ರಥೈಃ||15||

ಸ್ರವತಾರುಧಿರೇಣಾಥ ಸ್ರವಂತ್ಯೋ ದರ್ಶಿತಾಃ ಪಥಿ|
ವಿವಿಧೈಶ್ಚ ಸ್ವರೈರ್ಲಂಕಾ ನನಾದ ವಿಕೃತಂ ತದಾ||16||

ಸತಾನ್ಪ್ರವೃದ್ದಾನ್ವಿನಿಹತ್ಯ ರಾಕ್ಷಸಾನ್
ಮಹಾಬಲಶ್ಚಂಡಪರಾಕ್ರಮಃ ಕಪಿಃ|
ಯುಯುತ್ಸುರನ್ಯೈಃ ಪುನರೇವ ರಾಕ್ಷಸೈಃ
ತಮೇವ ವೀರೋಽಭಿಜಗಾಮ ತೋರಣಮ್||17||

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ಆದಿಕಾವ್ಯೇ ವಾಲ್ಮೀಕೀಯೇ
ಚತುರ್ವಿಂಶತ್ ಸಹಸ್ರಿಕಾಯಾಂ ಸಂಹಿತಾಯಾಮ್
ಶ್ರೀಮತ್ಸುಂದರಕಾಂಡೇ ಪಂಚಚತ್ತ್ವಾರಿಂಶಸ್ಸರ್ಗಃ ||

|| Om tat sat ||